barquiñas de papel
Obradoiros creativos
Proxectos educativos
Portofoliotallervideotecaprensa

” un día mirei pola ventá e pensei que bonito sería encher o mar de barquiños de papel de cores.”

mimadriña é un proxecto creativo da educadora social e artesá Palmira Castro.

mimadriña é artesanía en papel e origami mariñeiro, máis tamén é unha proposta de acción educativa e social que emprega como ferramenta base o origami e as emocións a partes iguais, que narra unha historia que nace e medra nun pequeno lugar da Costa da Morte, en Sardiñeiro .”

 o meu marco teórico?
a creatividade, as emocións na acción artesanal e no proceso educativo, como elemento motivador para a transformación das persoas, ideas e sociedades.

que fago?

«cando me preguntan que fago en mimadriña gústame dicir que fago barquiñas de papel, pero recoñezo que digo iso para provocar emocións na xente»

artesanía en papel e origami mariñeiro

todas as pezas mimadriña son parte dun proceso íntimo, unha conversa dende unha ventá entre o que vexo, o que percibo e a miña identidade composta de centos de conversas mantidas ca miña sobriñada, coa xente que coñecín e coñecerei.

“xa o dicía estes días, primeiro mirei pola ventá e vin o que me rodeaba, despois fixen unha barquiña de papel e púxenme a navegar, foi tan bonita a travesía que convencín a un montón de nenas e nenos para que fixeran a súa barquiña e navegasen miño abaixo defendendo o que é noso, de alí ó pouco empecei a argallar peixes de origami e chegou o momento de pesca e fixen unha cana cun pau que atopei na praia, fixen redes e ata unha nasa, e a pesca foi boa! cheguei á praia e pensei que podía facer con tanto peixe fresco, e entón lembreime da tradición conserveira do meu pobo sardiñeiro e da importancia que tivo no ser e no sentir dos meus veciños e veciñas. estaba claro! tiña que montar unha conserveira…”

Portofolio

formación e proxectos educativos

creatividade e artesanía na escola, normalización lingüística, internet, blogs e software libre na intervención educativa, marca persoal, son algunhas dos temas formativos que teño desenvolvido.

normalmente aprendo a partes iguais que ensino.

cada proxecto mimadriña é/foi diferente ou tento que sexa así, elaborando un valor engadido novo en cada unha das miñas intervencións e propostas, adaptando os contidos aos participantes e o espazo ao que vai dirixido, establecendo conversas coas partes e aprendendo en común o longo do proceso.

talleres creativos

tras varios meses facendo cousas cas mans dende a beira dunha ventá, tiña que pasar á acción e dar conta do proceso e facer, sempre facer. foi así como naceron os obradoiros creativos mimadriña, primeiro facer e despois reflexionar e ensinar o aprendido, pequenas intervencións formativas que abordan fermosas historias.

obradoiros creativos intensivos dirixidos á cativada e a adultos soñadores, á comunidade educativa, a institucións públicas e entidades privadas.

Comunicación e creación de contidos dixitais, a narración.

IMG_0655

todo é intimidade, todo é identidade.

é importante que teñas unha historia que contar

o blog de mimadriña é pura identidade costeira, dá conta da importancia do proceso creativo do proxecto, favorecendo un recurso inspirador para outros. son a maioría das veces ideas que nacen de ilusións, da poética e a observación meticulosa e crítica da realidade. detrás de cada proxecto mimadriña hai unha narración, descúbreas.

“…. durante moitos, moitísimos anos, os meus debuxos estiveron pendurados da parede do materno infantil da coruña. cando regresábamos de volta para sardiñeiro, as árbores eran diferentes, e as cunetas estaban cheíñas de fieitas, cheas de alquitrán, eu sentía peniña por elas, e para compensalas, a miúdo pensaba nelas. outra pregunta recurrente das miñas e sen resposta era “por que os montes cheiraban tan ben se non tiñan unha nai que freghara neles…”

Aínda que teño participado en moitos proxectos de comunicación e creación de contidos dixitais anteriormente a mimadriña, foi este proxecto o que amosou a miña capacidade para conar historias na rede, por iso, colaboro con outros blogs e proxectos, creando webs, xestionando contidos en redes sociais e blogs ou formando en TICS.


decoración de espazos e eventos

gústanme os espazos vacíos, transformalos, recuperar a súa identidade, facer posibles historias, contar historias, crear mundos posibles e de vez en cando, déixanme facelo, si na rúa, nun río, nunha fonte ou no mar mellor que mellor!

“a diferenza entre un espazo vivo e un espazo morto: a maneira en que os seres humanos que están nel áchanse situados, un en relación co outro”, peter brook.

“temos a abriga de inventar outro mundo porque sabemos que outro mundo é posible. pero incumbenos a nós o construílo coas nosas mans entrando en escena, no escenario da vida”, augusto boal.

proxectos

algúns dos traballos feitos

eu son?

_MG_3045

 

Palmira Castro Marcote

“mimadriña”

Educadora social, artesá e contadora de historias

Nacín  e crecín en Sardiñeiro, un dos lugariños máis fermosos  e con bonita historia da Costa da Morte, que vou dicir eu! 

 Estudei Historia, Teatro e Educación Social, todo remexido, co tempo e ca distancia caín na conta que ben podería tamén estudar carpintería, cociña, belas artes, fotografía,  deseño gráfico, xornalismo ou programación, pero ata o momento non me deu a vida para máis, todo se andará.

 Tiven moitos traballos  do que estudei e moitos ata bos e moi bos, pero deixeinos todos, non descarto volver algún día a eles, pero antes teño que facer moitas outras cousas por min mesma, sei que mimadriña non será o meu  único e definitivo proxecto, de feito xa non o é, son a outra metade de etel&pan.

 a miña natureza como muller da costa da morte faime traballadora incansable e cunha oralidade moi retranqueira. seica cumplo todos os requisitos para ser unha boa storyteller! a nena que son convírteme en creativa  e curiosa compulsiva, crecín vendo unha illa no horizonte e soñei moitas veces en ir nunha barquiña de papel.
de maior quero ser moitas cousas  e persoas como por exemplo jimmy liao!

 o meu marco teórico?
a creatividade, as emocións na acción artesanal e educativa, como elemento motivador para a transformación das persoas, ideas e sociedades.

 este é o meu cv

 

 

de cando en vez colaboran conmigo

SONY DSC

Víctor Gonzalez

Programador e educador
o primeiro que ollou que mimadriña era posible
fai  web e vídeos bonitos
lercha.eu

_MG_3976

Cris e Bea

Elas son
Nova Xestión Cultural
son nais, viaxan e observan…
fan posibles proxectos bonitos

SONY DSC

Etel Bande

fotógrafo e educador
di que a beleza está no interior
pero namorou da costa
fai fotos bonitas
etelbande.com

manifesto

IMG_6781

se o que ollas a través da túa ventá é gris, ponlle cores. se o que tes entre mans non funciona, tenta arranxalo. non perdas o tempo queixándote ou falando. síntete libre para facer o que che pase pola cabeza. sé independente das opinións e consellos que che dean, sexan bos ou malos. alimenta a túa curiosidade: coñece, aprende, curiosea, pregunta, socializa. practica facendo cousas que nunca pensaches facer, ao mellor convértese na túa ilusión. crea o teu propio pensamento. se tes que alonxarte durante un tempo, faino. non repitas nin difundas os pensamentos de outros sen ter pensamento crítico. se coñeces xente moi crack e te fascinou o seu traballo, difunde a súa obra. contáxiate da ilusión e da capacidade de estimular e crear. non te limites pensando que un día esa ilusión se vai acabar, e se se acaba, o camiño realizado non será un fracaso, será unha nova experiencia. fracaso sería non aprender nada. o importante é o camiño. non te preocupes polo desgaste, nada permanece novo. esquece a perfección. resiste ás tendencias impostas, crea ti tendencia. se tes unha idea ponte con ela, pouco a pouco, disfruta de ollar como vas evolucionando. o mundo está cheo de xente creativa, non te asustes, son coma ti, un día comezaron. comparte as túas ideas. comparte o teu entusiasmo. comparte as túas habilidades. a práctica diaria favorece a creatividade. a creatividade favorece a ilusión. a ilusión favorece o sorriso. o sorriso favorécete.

manifesto mimadriña



		

contacto

Podes escribirme a   palmira@mimadrinha.com

 Sardiñeiro de Abaixo //  Costa da Morte // A Coruña

Uso de cookies

Este é o común texto legal que informa que este sitio web utiliza cookies para que vostede teña a mellor experiencia de usuario. Si continúa navegando está dando o seu consentimento para a aceptación destas galletiñase e a aceptación da política de cookies ACEPTAR